သင့်မိသားစု ကျန်းမာရေး ပိုမိုတိုးတက်ကောင်းမွန်လာစေရန် ရိုးရှင်းလွယ်ကူသည့် နည်းလမ်းသုံးသွယ်

ဒို့တွေရဲ့ နေ့စဉ်ဘ၀မှာ ကိုယ်လက်လေ့ကျင့်ခန်း ပုံမှန်ပြုလုပ်ခြင်းနဲ့ အာဟာရပြည့်၀မျှတတဲ့ အစားအသောက်တွေမှီဝဲခြင်းဆိုတဲ့ အလေ့အကျင့်နှစ်ခုကိုပေါင်းစပ်လိုက်ရုံနဲ့ ကျန်းမာပျော်ရွှင်တဲ့မိသားစုဘ၀တစ်ခုပိုင်ဆိုင်ဖို့ အတွက် အောင်မြင်ဖို့ လမ်းစပဲဖြစ်ပါတယ်။ ဒီလိုအောင်မြင်ဖို့အတွက် သင်လုပ်ဆောင်နိုင်တဲ့ ရိုးရှင်းတဲ့ အဆင့်သုံးဆင့်ရှိပါတယ်။

 

သင့်မိသားစုအတွက် ပိုမိုကျန်းမာတဲ့ဘဝနေထိုင်မှုပုံစံ Healthy Lifestyle ကို သင်နေ့စဉ်ရွေးချယ်စားသုံးနေတဲံ အစားအသောက်တွေကို ပြောင်းလဲမှုအနည်းငယ်လုပ်ရုံနဲ့ ရိုးရှင်းစွာ ဖန်တီးနိုင်ပါတယ်။

 

ဥပမာ သင်နှစ်သက်တဲ့ စားသောက်ဆိုင်မှာ ပေါက်စီကိုလွယ်လွယ်ကူကူဝယ်စားနိုင်ပေမယ့် မြန်မာနိုင်ငံသားအများစု နှစ်သက်တဲ့  ကတ်ကြေးကိုက်နဲ့ ကြက်ဆီထမင်း လိုမျိုးအစားအစာတွေကတော့ ပြည့်၀ဆီများစွာပါဝင်တဲ့အတွက် ကျန်းမာတဲ့ဘဝနေထိုင်မှုပုံစံရရှိဖို့ ရွေးချယ်သင့်တဲ့ အရာတွေမဟုတ်ပါဘူး။

 

အဲ့ဒီအစား ကော်ဖီဆီုင်လိုနေရာမျိုးမှာ အပြင်စာတွေစားဖြစ်တဲ့အခါ တတ်နိုင်သမျှ ကျန်းမာရေးနဲ့ညီညွတ်တဲ့အစားအစာတွေကို ရွေးချယ်စားသောက်သင့်ပါတယ်။ ဥပမာ အဆီနည်းပြီး အသား၊ ဟင်းသီးဟင်းရွက်မျိုးစုံနဲ့ အစေ့အဆံတွေပါဝင်တဲ့ ဆာဘူးသီး လိုအစားအစာတွေကို ရွေးချယ်သုံးဆောင်ခြင်းအားဖြင့် Healthy Habit ကျန်းမာတဲ့အလေ့အကျင့်ကောင်းများကို တဖြည်းဖြည်းမွေးမြူသင့်ပါတယ်။ ဆာဘူးသီးဟာ ဒို့တွေနဲ့  ရင်းနှီးပြီးသား ဟင်းလျာတစ်ခုဖြစ်ပြီး ချင်းလူမျိုးတွေရဲ့ ရိုးရာအစားအစာ အဖြစ်လူသိများပါတယ်။  ဆာဘူးသီးဟာ ဆီမပါတဲ့ စွတ်ပြုတ်တစ်မျိုးဖြစ်တဲ့ အတွက် Diet လုပ်နေသူတွေ၊ ဆီးချိုသမားတွေ၊ ကျန်းမာရေးနဲ့ ညီညွတ်စွာ စားသုံးချင်သူတွေ အတွက်အထူးသင့်တော်ပါတယ်။  ဆာဘူးသီးရဲ့ အဓိကပါဝင်ပစ္စည်းနှစ်မျိုးကတော့   ပြောင်းဖူးစေ့နဲ့ အမဲသားတို့ပဲ ဖြစ်ပါတယ်။ ဒီနေရာမှာ ပြောင်းဖူးကို အဓိကထားပြီး ချက်ပြုတ်ထားတဲ့ အတွက် ဒို့တွေရဲ့  နေ့စဉ်စားနေကျဖြစ်တဲ့ ထမင်းထက်ပိုပြီး သွေးတွင်းကိုလက်စထရောဓာတ်ကိုလျှော့နည်းစေပါတယ်။ ဒါ့အပြင် အမဲသားပါဝင်တဲ့အတွက် ဒို့တွေရဲ့ ခန္ဓာကိုယ်အတွက် လိုအပ်တဲ့ အသားဓာတ်ကိုဖြည့်တင်းပေးပြီး သွေးအားကောင်းစေရုံသာမက   ကြက်သွန်နီ၊ ဂျင်း၊ သျှားနံနံ၊ ငရုတ်သီး၊  ပဲ၊ ပဲရွက်၊ ပဲသီး နဲ့  ဟင်းနုနွယ်ရွက် လိုမျိုးခန္ဓာကိုယ်ကို ကောင်းကျိုးပြုစေတဲ့ အသီးအရွက်တွေပါဝင်တာကြောင့် သွေးတွင်းအဆီဓာတ်ကို လျော့နည်းစေပြီး၊ ဗီတာမင် အေ နဲ့ ပရိုတင်းဓာတ်တို့ ကြွယ်၀စွာပါဝင်တဲ့အတွက် မှတ်ဉာဏ်အားနဲ့ အမြင်အာရုံတို့ကိုလည်း ကောင်းမွန်စေတဲ့ Healthy Food တစ်မျိုးပဲဖြစ်ပါတယ်။

 

ဒီနေရာမှာ ရိုးရိုးထမင်းအစား ဗီတာမင်အမျိုးမျိုးနဲ့ Antioxidant တွေပါတဲ့  ဆန်လုံးညိုကိုအစားထိုး စားသောက်တာက ခန္ဓာကိုယ်အတွက် ပိုပြီးကောင်းမွန်တဲ့ အကျိုးသက်ရောက်မှုတွေဖြစ်စေပါလိမ့်မယ်။ ဒါမှမဟုတ် ကိုယ်တိုင်ချက်ပြုတ်စားသောက်တဲ့ အခါမျိုးမှာ အဆီပမာဏအနည်းသာ ပါဝင်တဲ့ ငါးစွပ်ပြုတ်လို ဟင်းပွဲမျိုးကို ချက်စားကြည့်ပါ။ ငါးစွပ်ပြုတ်မှာ အသားဓာတ်၊ အမျှင်ဓာတ်နဲ့ ကာဗိုဟိုက်ဒရိတ်တွေပါဝင်တာကြောင့် အစွမ်းထက်တဲ့ Healthy Food တစ်ခုဖြစ်ပါတယ်။ ဒါ့အပြင် cholesterol နဲ့ အဆီပမာဏများတဲ့ နွားနို့ ဒါမှမဟုတ် အဆီပမာဏကို သုံးဆတိုးစေမယ့် ဆီကြော်အစားအစာဖြစ်တဲ့  ငါးကြော်လိုမျိုးအရာတွေကို ရှောင်သင့်ပါတယ်။

 

နောက်ပြီး သင်ကအချိုကြိုက်တဲ့ သူလား?  ပဲရေခဲသုတ်နဲ့  မုန့်လက်ဆောင်းတို့လိုမျိုး သကြားနဲ့ အဆီဓာတ်ပါဝင်မှု မြင့်မားတဲ့ ဒေသထွက် အချိုပွဲတွေအစား သဘာ၀အသီးအနှံတွေဖြစ်ပြီး  ဗီတာမင် A နဲ့ C တို့ကြွယ်၀တဲ့ သင်္ဘောသီး ၊ အမျှင်ဓာတ်နဲ့ Antioxidant ပြည့်၀တဲ့ သရက်သီး ဒါမှမဟုတ် အဆီဓာတ်နည်းပြီး အမျှင်ဓာတ်နဲ့ ဗီတာမင် C တွေကြွယ်၀တဲ့ နဂါးမောက်သီး တို့လိုမျိုး ဒေသထွက်အသီးအနှံတွေကို ရွေးချယ်စားသုံးခြင်းအားဖြင့်လည်းကျန်းမာတဲ့အလေ့အကျင့်ကောင်းများကိုပျိုးထောင်သင့်ပါတယ်။

 

သင့်တင့်မျှတတဲ့ အစားအသောက်အပြောင်းအလဲတွေလုပ်ဆောင်ပါ။

 

သင့်အကြိုက်ဆုံးအစားအစာတွေက Healthy Food တွေမဟုတ်ခဲ့ဘူးဆိုရင်   ကျန်းမာရေးနဲ့ ပိုညီညွတ်ရုံသာမက အရသာပိုရှိပြီး ရိုးရှင်းတဲ့ အခြား ကျန်းမာရေးနဲ့ညီညွတ်တဲ့အစားအစာတွေကို အစားထိုးရွေးချယ်စားသုံးလို့ရပါတယ်။

သွေးတွင်းသကြားဓာတ်ကို မြင့်တက်စေပြီး အဝလွန် ရောဂါရဲ့ ဆက်စပ်ရောဂါတွေဖြစ်တဲ့ နှလုံးရောဂါ၊ ဆီးချိုရောဂါ စတဲ့ နာတာရှည်ရောဂါတွေကို ဖြစ်ပွားစေတတ်ပြီး  ကာဗိုဟိုက်ဒရိတ်မြင့်မားစွာပါဝင်တဲ့ ဆန်ဖြူ လိုမျိုး အစားအစာတွေကို တတ်နိုင်သမျှ အနည်းဆုံးပမာဏအထိ လျှော့စားသင့်ပါတယ်။  အဲဒီအစား အာဟာရဓာတ်နဲ့ အမျှင်ဓာတ်တွေကြွယ်၀စွာပါဝင်တဲ့ မုယောစပါး၊ ဆန်လုံးညို၊အုတ်ဂျုံ နဲ့ ပြောင်းဆန်နဲ့  ပေါင်မုန့်ကြမ်းတွေကို အစားထိုးစားသုံးနိုင်ပါတယ်။

ပေါင်မုန့်ကို အဆီများတဲ့ ထောပတ်တွေသုတ်စားမယ့်အစား လတ်လတ်ဆတ်ဆတ် ထောပတ်သီးကို ထုချေပြီး ပေါင်မုန့်ပေါ်မှာသုတ်လိုက်ပါ။ဒါ့အပြင် ငှက်ပျောသီးလို အလွယ်တကူဝယ်လို့ရတဲ့ အသီးအနှံမျိုးကလည်း  နှလုံးကျန်းမာရေးကို အထောက်အကူပြုတဲ့ ပိုတက်စီယမ်ဓာတ်  နှစ်ဆပါဝင်ရုံသာမက အမျှင်ဓာတ်ကြွယ်ဝပြီး သင့်ခန္ဓာကိုယ်အတွင်းမှာရှိတဲ့ မကောင်းတဲ့ ကိုလက်စထရော Level ကို လျှော့ချပေးနိုင်ပါတယ်။

ဒါမှမဟုတ် သင်က သရေစာတွေကို နှစ်သက်တဲ့သူလား?

သင်စားနေကျ သရေစာ အာလူးချောင်းကြော်တွေအစား ဗီတာမင် A နှင့် ပိုတက်စီယမ်တို့ ကြွယ်၀တဲ့အပြင်  ကျန်းမာရေးနဲ့ပိုညီညွတ်ပြီး အရသာရှိနေဆဲဖြစ်တဲ့ ကန်စွန်းဥဖုတ် ကိုအစားထိုးစားသုံးလိုက်ပါ။

 

လှုပ်လှုပ်ရှားရှားနေပါ။

 

သင့်မိသားစုရဲ့ နေ့စဉ်လုပ်ရိုးလုပ်စဉ် Activities တွေမှာ ပျော်ရွှင်စရာကိုယ်လက်လှုပ်ရှားမှုတွေကို ထည့်သွင်းခြင်းဖြင့် ကျန်းမာတဲ့ အလေ့အကျင့်ကောင်းတွေကိုမွေးမြူနိုင်ပါတယ်။

ဥပမာ- သင့်မိသားစုဝင်များဟာ အထိုင်များသူတွေဖြစ်ခဲ့မယ်ဆိုရင် အချိန်ကြာကြာတီဗွီထိုင်ကြည့်ခြင်း ဒါမှမဟုတ် ညစာစားပြီးပြီးချင်း ကွန်ပြူတာရှေ့မှာထိုင်ခြင်းစတဲ့  အချိန်ပမာဏကို လျှော့ချပေးပါ။ အဲဒီအစား အိမ်နဲ့ အနီးဆုံးပန်းခြံကိုသွားပြီး မိသားစုဝင်တွေ အတူတူလမ်းလျှောက်ကြမယ်ဆိုရင် ရေရှည်မှာ Healthy Family Lifestyle  ကိုရရှိဖို့ သေချာသလောက်ပါပဲ။ အကယ်လို့ သင့်မှာကလေးတွေရှိခဲ့မယ်ဆိုရင်လည်း  သူတို့နဲ့ အတူ လှုပ်လှုပ်ရှားရှားကစားရတဲ့ ဂိမ်းတွေမှာ ပါဝင်ပါ။ သင့်ကလေးငယ်တွေနဲ့အတူ ပြေးလွှားဆော့ကစားခြင်းဟာ သင့်နှလုံးသွေးလှည့်ပတ်မှုကို ကောင်းမွန်စေတဲ့ ပျော်စရာနည်းလမ်းလေးတစ်ခုဖြစ်ပါတယ်။ ဒါမှမဟုတ် သင့်မှာ ခွေးလေးတစ်ကောင်ရှိတယ်ဆိုရင် သူနဲ့အတူတူလမ်းလျှောက်တာ ဒါမှမဟုတ် ပြေးတာတို့ ပြုလုပ်ပြီးတော့လည်းကျန်းမာတဲ့ အလေ့အကျင့်ကောင်း လေးတွေကို မွေးမြူလိုက်ပါ။

 

ကျန်းမာတဲ့ အလေ့အကျင့်ကောင်းတွေကို လက်ခံကျင့်သုံးနိုင်ရန်အတွက် အတွေးအခေါ်ပြောင်းလဲဖို့ လိုအပ်သလို ထိုပြောင်းလဲမှုက သင်နဲ့  သင့်မိသားစု ဘဝနှောင်းပိုင်းမှာကြုံတွေ့လာရနိုင်တဲ့ နာတာရှည်ရောဂါတွေကို ကာကွယ်နိုင်တဲ့ အကျိုးသက်ရောက်မှုရှိစေတယ်ဆိုတာကို သတိပြုသင့်ပါတယ်။

 

ရောဂါများကို ကာကွယ်ရန်အတွက် ကြိုတင်စီမံရမည့်နည်းလမ်းများကိုလည်း ရှာဖွေထားသင့်ပါတယ်။